ޢަބްދުލްޢަޒީޒް ޙުސައިން

އައްޝައިޚް ޢަބްދުލްޢަޒީޒް ޙުސައިން ނުވަތަ މަޝްހޫރު ނަމުން ނަމަ (އަޒީބެ) އަކީ ދީނީ ތަޢުލީމު އުނގެނިވަޑައިގެން ހުންނެވި ބޭފުޅެކެވެ. ދިވެހިރާއްޖެއިން ތަޢުލީމު އުނގެނިވަޑައިގަތުމަށް ފަހު ދެން ވަޑައިގެންނެވީ ޕާކިސްތާނަށެވެ. ޕާކިސްތާނުގެ ޖާމިޢާ ސަލަފިއްޔާގައި ކިޔަވައި ވިދާޅުވުމަށްފަހު ޕާކިސްތާނުގެ ކަރާޗީގެ "ދާރުލް ޙަދީޘް" ކިޔާ ތަނެއްގައި ޤުރްއާން ހިތުދަސްކުރެއްވިއެވެ. އެއަށްފަހު ސަޢޫދީ ޢަރަބިއްޔާގެ މުޙައްމަދު ބިން ސުޢޫދު އިސްލާމިކް ޔުނިވަރސިޓީގައި ތަޢުލީމު ޙާޞިލުކުރެއްވިއެވެ.

އައްޝައިޚް ޢަބްދުލްޢަޒީޒް ޙުސައިން ކިޔަވައި ވިދާޅުވެގެން ރާއްޖެ ވަޑައިގަތުމަށްފަހު އެންމެ ފުރަތަމަ ޚިދުމަތް ކުރެއްވީ އުފަން ރަށް، ބ. ހިތާދޫ އުއްމުލް ޤުރާ ސެކަންޑަރީ ސްކޫލުގައެވެ. ދެން ބ. ހިތާދޫ ސްކޫލުގައެވެ. މީގެއިތުރުން ދިވެހިރާއްޖޭގެ އަޑާއި، ކީރިތި ޤުރްއާނާ ބެހޭ ޤައުމީ މަރުކަޒުގައި ވެސް ޚިދުމަތްކުރައްވައިފައިވެއެވެ. މިހާރު ހުންނެވީ ދިވެހިރާއްޖޭގެ އިސްލާމީ ޔުނިވަރސިޓީގެ ކުއްލިޔަތުލް ޤުރްއާން ވައްސުންނާގެ ލެކްޗަރަރއެއްގެ މަޤާމުގައެވެ. އަދި އެ ކުއްލިޔާގެ ޑީންކަން މީގެކުރިން އަދާކުރައްވައިފައިވެއެވެ. ހަމައެހެންމެ ވަރަށް ގިނަ ތަންތަނުގައި ކިޔަވައިދެއްވައިފައިވެއެވެ.

މީގެއިތުރުން އައްޝައިޚް ޢަބްދުލްޢަޒީޒް ޙުސައިނަކީ ދިވެހިރާއްޖޭގެ ރައްޔިތުން ޙައްޖާއި ޢުމްރާއަށް ގެންގޮސްދެއްވުމަށް ޓަކައި އަމިއްލަ ކުންފުންޏެއް ހައްދަވައިގެން އެ ޚިދުމަތް ވެސް ދެމުން ގެންދަވާ ބޭފުޅެކެވެ.