ޙުސައިން ޔޫސުފް

ފަޟީލަތުއްޝައިޚް އަލްމަރްހޫމް ޙުސައިން ޔޫސުފަކީ، 29 އަހަރަށްވުރެ ދިގު މުއްދަތެއްގައި ސަރުކާރަށް އިޚްލާޞްތެރި ޚިދުމަތްތަކެއް ކުރައްވާފައިވާ ބޭފުޅެކެވެ. ފުރަތަމަ އަދާކުރެއްވީ ބޮޑު އިސްޓޯރުގެ ކާތިބުކަމެވެ. އޭގެފަހުން، ވުޒާރަތުލް މަޢާރިފުގެ ކާތިބުކަންވެސް ކުރެއްވިއެވެ.

ފަޟީލަތުއްޝައިޚް އަލްމަރްޙޫމް ޙުސައިން ޔޫސުފް، މަދީނަތުލް މުނައްވަރާގެ އިސްލާމިކް ޔުނިވަރސިޓީއިން ޝަރުޢީ ދާއިރާއިން ބެޗްލަރސް ޑިގްރީ ހާސިލުކުރެއްވުމަށްފަހު ރާއްޖެ ވަޑައިގެން ފުރަތަމަ އަދާކުރެއްވީ މިނިސްޓްރީ އޮފް ޖަސްޓިސްގެ ޤާޟީކަމެވެ. މިނިސްޓްރީ އޮފް ޖަސްޓިސްގެ ޚާއްޞަ ޤާޟީކަމާއި، އެ މިނިސްޓްރީގެ ޑިރެކްޓަރ އޮފް ޖުޑީޝަލް އެފެއާޒް ކަމުގެ މަގާމާއި، ޑިރެކްޓަރ ޖެނެރަލް އޮފް ޖުޑީޝަލް އެފެއާޒް ކަމުގެ މަގާމާއި، އެގެޒެކްޓިވް ޑިރެކްޓަރ ކަމުގެ މަގާމާއި ޤާނޫނީ ކަންކަމަށް ލަފާދޭ ޚާއްޞަ މުޝީރުކަން ކުރެއްވިއެވެ. ފުރަތަމަ ޕެންޝަން ލިބިވަޑައިގެންފައިވަނީ 14 ޖޫން 2003 ގައެވެ.

ޙުސައިން ޔޫސުފް އެންމެ ދިގު މުއްދަތެއްގައި ޚިދުމަތް ކުރައްވާފައިވަނީ ރާއްޖޭގެ ޝަރުޢީ ދާއިރާގައެވެ. ރާއްޖޭގެ ޝަރުޢީ ދާއިރާގެ ވަރަށް އިސް މަގާމުތަކެއްގައި ހުންނަވައިގެން އެ ދާއިރާގެ ތަރައްޤީއަށާއި ކުރިއެރުމަށް ކުރައްވާފައިވާ ޚިދުމަތްތަކަކީ ފާހަގަކޮށްލެވޭ ޚިދުމަތްތަކެކެވެ.

ފަޟީލަތުއްޝައިޚް އަލްމަރްހޫމް ޙުސައިން ޔޫސުފަކީ، ދިވެހިރާއްޖޭގެ ހައިކޯޓުގެ ފަނޑިޔާރުކަމުގެ މަގާމާއި، ރައީސުލްޖުމްހޫރިއްޔާގެ އޮފީހުގެ ވަކީލުކަމުގެ މަގާމާއި، އިސްލާމީ ކަންތައްތަކާބެހޭ އެންމެ މަތީ މަޖިލީހުގެ ޚާއްޞަ މުޝީރުކަމުގެ މަގާމާއި، މަދްރަސަތުލް ޠައިބާގެ ޢަރަބި އިސްލާމް ކިޔަވައިދޭ މުދައްރިސް ކަމުގެ މަގާމުވެސް ފުރުއްވާފައިވާ ބޭފުޅެކެވެ. މީގެ އިތުރުން ރާއްޖެ އިން ބޭރުގައި ކިޔަވަން ބޭނުންވާ ދިވެހިން ޝައިޚް ޙުސައިން ޔޫސުފްގެ އަމިއްލަ ޚަރަދުގައި ރާއްޖެ އިން ބޭރަށް ފޮނުއްވިއެވެ. ވަރަށް ގިނަ ދަރިވަރުން ޝައިޚް ޙުސައިން ޔޫސުފްގެ ޚަރަދުގައި ޕާކިސްތާނުގައި ކިޔެވިއެވެ.

ފަޟީލަތުއްޝައިޚް އަލްމަރްހޫމް ޙުސައިން ޔޫސުފް ވަނީ 1989 ން ފެށިގެން މަދްރަސަތުއް ނަހްޒާގެ ނަމުގައި، ފަހުން އުއްމުލްޤުރާ ސެކަންޑަރީ ސްކޫލުގެ ނަމުގައި ބ.ހިތާދޫގައި މަދަރުސާއެއް ހިންގަވައިފައެވެ. މި ސްްކޫލުގައި ސާނަވީ ފެންވަރަށް ކިޔަވައި ދެއްވަމުން ގެންދަވައިފައިވެއެވެ.

ފަޟީލަތުއްޝައިޚް ޙުސައިން ޔޫސުފް އަވަހާރަވީ އާލާސްކަންފުޅާ އުޅުއްވާތާ ދުވަސްތަކެއްވުމަށްފަހު 2020 ވަނަ އަހަރުގެ މޭ މަހުގެ 6 ވަނަ ދުވަހު އިންޑިއާގައެވެ. އަވަހާރަވީއިރު ޢުމުރުފުޅަކީ 78 އަހަރުފުޅެވެ.