މުޙައްމަދު ކިނާނަތު
ޑރ. މުޙައްމަދު ކިނާނަތު ވަނީ ނިއުޒީލެންޑްގެ ވިކްޓޯރިއާ ޔުނިވަރސިޓީ އޮފް ވެލިންގޓަން އިން "އިންފޮމޭޝަން ސިސްޓަމްސް" ގެ ރޮނގުން ޕީ.އެޗް.ޑީ. ހާސިލު ކުރައްވައިފައެވެ. އަދި އީ-ކޮމާސްގެ ރޮނގުން އޮސްޓްރޭލިއާގެ ގްރެފިކް ޔުނިވަރސިޓީން މާސްޓަރސް ޑިގުރީ ހާސިލުކުރައްވައިފައިވެއެވެ. މާސްޓަރސްއަށް ކިޔަވައިވިދާޅުވަމުން ގެންދެވިއިރު ކުރެއްވި ހިތްވަރާއި، އާދަޔާ ޚިލާފު މަސައްކަތްތައް ފާހަގަކުރައްވައި، އޮސްޓްރޭލިއާގެ ގްރެފިކް ޔުނިވަރސިޓީއިން ވަނީ "ގްރެފިކް އެވޯޑް އޮފް އެކެޑަމިކް އެކްސެލެންސް-2004" އެވޯޑު ދެއްވައިފައެވެ. އަދި މާސްޓަރޒް ފުރިހަމަކުރައްވައި ހޯއްދެވި ކާމިޔާބީ ފާހަގަކުރައްވައި، ވިލާ ފައުންޑޭޝަނުން 2007 ވަނަ އަހަރު ވަނީ "ޤާސިމް އިބްރާހީމް އެވޯޑް ފޮރ އެކެޑަމިކް އެކްސެލެންސް" ދެއްވައިފައެވެ.
އިންފޮމޭޝަން ޓެކްނޮލޮޖީގެ އެންމެ އިސް ބޭފުޅެއްގެ ގޮތުގައި، ދިވެހިރާއްޖޭގައި ހުންނަ ޔުނިސެފް މޯލްޑިވްސްގެ އޮފީހުގައި، ދެ އަހަރަށްވުރެ ގިނަދުވަހު، ޑރ. ކިނާނަތު މަސައްކަތް ކުރައްވައިފައިވެއެވެ. އަދި ވިލާ ކޮލެޖުގެ ފެކަލްޓީ އޮފް އިންފޮމޭޝަން ޓެކްނޮލޮޖީގެ ޑީންކަމާއި، ވިލާ ކޮލެޖުގެ ރެކްޓަރސް އޮފީހުގެ ޑައިރެކްޓަރުކަން އަދާކުރައްވައިފައިވެއެވެ.
ޑރ. މުޙައްމަދު ކިނާނަތަކީ، ރާއްޖެއާއި ރާއްޖެއިން ބޭރުގެ އެކި ފަރާތްތަކަށްވެސް ކޮންސަލްޓަންސީގެ ޚިދުމަތް ދެއްވަމުން ގެންދަވާ ބޭފުޅެކެވެ. މީގެތެރޭގައި، އިންދިރާގާނދީ މެމޯރިއަލް ހޮސްޕިޓަލްގެ އިންޑިޕެންޑެންޓް އިންފޮމޭޝަން ޓެކްނޮލޮޖީ ކޮންސަލްޓަންޓެއްގެ ގޮތުން 1 އަހަރު ދުވަހަށް ޚިދުމަތް ދެއްވުމާއި، މި ޕްރޮޖެކްޓް ނިމެންދެން ހިލޭ ކޮންސަލްޓެންސީ ދެއްވުމާއި، މެޑިފްލެކްސް ޕްރައިވެޓް ލިމިޓެޑުގެ ކްލިނިކަލް މެނޭޖްމަންޓް އެންޑް އިންފޮމޭޝަން ސިސްޓަމާއި، ލެބޯރެޓަރީ އިންފޮމޭޝަން މެނޭޖްމަންޓް ސިސްޓަމާ ބެހޭގޮތުން ކޮންސަލްޓަންސީ ދެއްވުމާއި، ކުރީގެ މިނިސްޓްރީ އޮފް ހަޔަރ އެޑިޔުކޭޝަން، އެމްޕްލޯއިމަންޓް އެންޑް ސޯޝަލް ސެކިއުރިޓީގެ ޓްރޭނިންގ މެނޭޖްމަންޓް އިންފޮމޭޝަން ސިސްޓަމް ސޮފްޓްވެއަރ މަސައްކަތުގައި ކޮންސަލްޓަންސީ ދެއްވުން ހިމެނެއެވެ. މިހާރު ޢަމަލުކުރަމުންގެންދާ ޤާނޫނުއަސާސީގެ ދަށުން ރާއްޖޭގައި ފުރަތަމަ ބޭއްވުނު ޕާލަމެންޓަރީ އިންތިޚާބުގައި ބޭނުންކުރުމަށް ކޮމްޕިއުޓަރ ސޮފްޓްވެއަރ އެޕްލިކޭޝަނެއް ތަރައްޤީކޮށްދެއްވައި، ސަރުކާރުގެ އޮފީސްތަކާއި، އަމިއްލަ ފަރާތްތަކުގެ އިންފޮމޭޝަން ޓެކްނޮލޮޖީއާއި، ބިޒްނަސް ޕްރޮގްރާމްތަކުގައި ކޮންސަލްޓަންޓެއްގެ ގޮތުގައި މަސައްކަތް ކުރައްވައިފައި ވެއެވެ.
ޑރ. މުޙައްމަދު ކިނާނަތު މިހާރު ހުންނެވީ މިނިސްޓަރ އޮފް ސްޓޭޓް ފޮރ ހޯމްލޭންޑް ސެކިއުރިޓީ އެންޑް ޓެކްނޯލޮޖީގެ މަޤާމުގައެވެ.