މުޙައްމަދު ރަޝީދު އިބްރާހީމް ރަޝީދު
އައްޝައިޚް މުޙައްމަދު ރަޝީދު އިބްރާހީމް ރަޝީދު ވަނީ އިންޑިއާގެ ޖާމިޢާ ދާރުއްސަލާމުގައި ތަޢުލީމު ޙާޞިލުކުރައްވައިފައެވެ. އެއަށްފަހު ޕާކިސްތާނުގެ ޖާމިޢާ ސަލަފިއްޔާގައި އަހަރަކާއި ދުވަސްކޮޅަކު ތަޢުލީމު ޙާޞިލުކުރެއްވުމަށްފަހު އުނގެނިވަޑައިގަތުމަށް ޓަކައި މަދީނާއަށް ވަޑައިގަތެވެ. މަދީނާގެ އަލްޖާމިޢަތުލް އިސްލާމިއްޔާ (މަދީނާ އިސްލާމިކް ޔުނިވަރސިޓީ) ގެ ކުއްލިއްޔަތުއް ލުޣަތިލް ޢަރަބިއްޔާގައި ތަޢުލީމު ހާސިލުކުރައްވައިފައެވެ.
އައްޝައިޚް މުޙައްމަދު ރަޝީދު އިބްރާހީމް ރަޝީދު ވަނީ އަލްމަދްރަސަތުލް ޢަރަބިއްޔަތުލް އިސްލާމިއްޔާގެ ޢަރަބިބަހުގެ މުދައްރިސްކަން ކުރައްވައިފައެވެ. އަދި އެ މަދްރަސާގެ މުސާޢިދުލް މުދީރު (ޑެޕިއުޓީ ޕްރިންސިޕަލް) ކަމާއި، މުދީރު (ޕްރިންސިޕަލް) ކަމުގެ މަޤާމު އަދާކުރައްވައިފައިވެއެވެ. އަލްމަދްރަސަތުލް ޢަރަބިއްޔަތުލް އިސްލާމިއްޔާގައި ފަންސަވީހަކަށް އަހަރު ޚިދުމަތްކުރައްވައިފައިވެއެވެ.
އައްޝައިޚް މުޙައްމަދު ރަޝީދު އިބްރާހީމް ރަޝީދަކީ، ރާއްޖެއިން ޙައްޖަށް އަދި ޢުމްރާއަށް ދާ މީހުންނަށް އެހީތެރިވެދެއްވައި، ދީނީ އިރުޝާދު ދެއްވުމުގައި، ޙަރަކާތްތެރިވެވަޑައިގަންނަވަމުން ގެންދަވާ ބޭފުޅެއް ވެސް މެއެވެ. ކިޔަވައިވިދާޅުވާން ހުންނެވި އިރު ވެސް އެ ކަން ކޮށްދެއްވައިފައިވެއެވެ. ޝައިޚް މުޙައްމަދު ރަޝީދު އެ ގޮތުން މަސައްކަތްކުރެއްވި ޙައްޖު/ޢުމްރާ ޖަމާޢަތްތަކުގެ ތެރޭގައި ޑީ.އައި.ކޭ ގްރޫޕް، ދީމާ ގްރޫޕް، ޒަޢީ ގްރޫޕް، އަތަމާ ގްރޫޕް، އަދި އެ ނޫންވެސް ޖަމާޢަތްތައް ހިމެނެއެވެ. މީގެތެރެއިން އެންމެ ގިނަ ދުވަހު ޚިދުމަތްކުރެއްވީ އަތަމާ ގްރޫޕުގައެވެ. އަތަމާ ގްރޫޕް ހުއްޓައިލައްވަންދެން އެ ގްރޫޕުގައި ޚިދުމަތްކުރެއްވިއެވެ. ހަމައެހެންމެ މޯލްޑިވްސް ޙައްޖު ކޯޕަރޭޝަންގެ ބޯޑުގެ ޗެއަރމަންގެ މަޤާމުގައި އަދިވެސް ގެންދަވަނީ ޚިދުމަތްކުރައްވަމުންނެވެ.