އިލްޔާސް ޙުސައިން

އައްޝައިޚް އިލްޔާސް ޙުސައިން ތަޢުލީމު ހާސިލުކުރެއްވުމަށް އިންޑިޔާއަށް ވަޑައިގަތީ އުމުރުން އެންމެ 9 އަހަރުގައެވެ. ކީރިތި ޤުރްއާން ހިތުދަސްކުރެއްވީ ގުޖުރާތުގެ ދާރުލްޢުލޫމުން ކިޔަވައި ވިދާޅުވަމުން ގެންދެވިއިރުގައެވެ. މަތީ ސާނަވީ ތަޢުލީމު ނިންމަވައި، 1987 ވަނަ އަހަރު، ބެޗްލަރ އޮފް އާރޓްސް އިން އިސްލާމިކް ސްޓަޑީޒް އެންޑް ޝަރީޢާ ހާސިލު ކުރެއްވީ ގުޖުރާތުގެ އިސްލާމިކް ޔުނިވަރސިޓީންނެވެ. މީގެ އިތުރުން 1993 ވަނަ އަހަރު، މަދީނާގެ އިސްލާމިކް ޔުނިވަރސިޓީގެ ކުއްލިއްޔަތުލް ޤުރްއާން ވައް ދިރާސާތުލް އިސްލާމިއްޔާއިން ކީރިތި ޤުރްއާނުގެ ޢިލްމުން ބެޗްލަރ އޮފް އާރޓްސްގެ ސަނަދު ހާސިލުކުރެއްވިއެވެ. އެއަށްފަހު، ދަޢުވާގެ ރޮނގުން މާސްޓަރސް ހާސިލު ކުރެއްވީ، އިސްލާމިކް ޔުނިވަރސިޓީ އޮފް މެލޭޝިޔާއިންނެވެ.

އިލްޔާސް ޙުސައިން ކިޔަވައިވިދާޅުވެގެން 1993 ވަނަ އަހަރުގެ ތެރޭގައި ރާއްޖެއަށް ވަޑައިގެން، ހިތަދޫގެ މަދުރަސަތުލް އިސްލާމިއްޔާގެ އިސްލާމް މުދައްރިސެއްގެ ގޮތުގައި ޚިދުމަތް ކުރައްވަން ފެށްޓެވިއެވެ. ކިޔަވައިދެއްވުމުގެ އިތުރުން، ދީނީ ދަޢުވާގެ ޕުރޮގްރާމުތައްވެސް އޭރު ކުރިއަށް ގެންދެވިއެވެ.

2010 ވަނަ އަހަރުން ފެށިގެން 2014 ވަނަ އަހަރާ ހަމަޔަށް ދިވެހިރާއްޖޭގެ ފިޤްހު އެކެޑަމީގެ މެންބަރުކަންވެސް އައްޝައިޚް އިލްޔާސް ޙުސައިން ކުރައްވައިފައި ވެއެވެ. އައްޝައިޚް އިލްޔާސް ޙުސައިނަކީ، ހުކުރުނަމާދާއި ޢީދުނަމާދު ކުރައްވާ، އަދި ނުބައްލަވާ ޚުޠުބާ ވިދާޅުވުމުގެ ހުއްދަ މިނިސްޓްރީ އޮފް އިސްލާމިކް އެފެއާޒުން ދެއްވައިފައިވާ މަދު ބޭފުޅުންގެ ތެރޭގައި ހިމެނިވަޑައިގަންނަވާ ބޭފުޅެއްވެސް މެއެވެ.

މިކަންކަމުގެ އިތުރަށް، އައްޝައިޚް އިލްޔާސް ޙުސައިނަކީ، މައްކާގެ ޙަރަމްފުޅުގައި ކޮންމެ އަހަރަކުވެސް ކުރިއަށް ގެންދާ ކިންގ ޢަބްދުލްޢަޒީޒް އިންޓަރނޭޝަނަލް ޤުރްއާން މުބާރާތުގެ ފަނޑިޔާރުކަން 1441 ވަނަ އަހަރު ކުރައްވައިފައިވާ ބޭފުޅެކެވެ. އެ މުބާރާތަކީ އިސްލާމީ ޤައުމުތަކުގެ ތެރެއިން 103 ޤައުމު ތަމްސީލުކުރި މުބާރާތެކެވެ.